Euskararen erabilera sustatuko da ile-apaindegietan

Og, 2015-05-07 15:41
Urte amaiera bitartean hainbat ekimen jarriko dira martxan establezimendu hauetan erabilera areagotzeko
 
Orain bost urtetik hona, urtero merkataritza sektore edo gremio bat hautatu ohi da bertan euskararen erabilera sustatzeko. Okindegietan, harategietan, arraindegietan eta barazki eta fruta dendetan ahalegin berezia egin ondoren, oraingoan, ile-apaindegiak izan dira hautaturikoak. 
Ekimen honek izan duen zabalkundea eta eragina ikusirik, aurten Oarsoaldea eskualdeko 100 bat ile-apaindegik parte-hartuko du. 
 
Testuinguru honetan, Oarsoaldeko Euskara Batzordeak ile-apaindegiei zuzendutako kanpaina berria aurkeztu du gaur. Ekitaldia Errenteriako Itziar Alvarez ile-apaindegiaren atarian izan da eta bertan izan dira Irune Balentziaga, Errenteriako zinegotzia; Irati Etxebeste, Oiartzungo zinegotzia; Migel Mari Torrea, Pasaiako zinegotzia; Mikel Arruti, Lezoko zinegotzia; Imanol Iparragirre, Errenkoalderen ordezkaria; Oskar Zapirain, Iturriren ordezkaria eta Ramon Illarregi, Laurak Baten ordezkaria.
 
Ekimen ugari urte amaiera bitartean
Pasaiako zinegotzia den Migel Mari Torreak azaldu duen bezala, aurtengoan egingo diren ekintza zehatzak honakoak dira: alde batetik, zerbitzuen berri emateko marko bat banatuko da ile-apaindegietan. Bertan eskaintzen dituzten zerbitzuen berri jasoko dute euskaraz, eta jarraian ile-apaindegian jarriko dute bezeroek ikus dezaten. Bestetik, irrati-tarteak ere aireratuko dira Euskadi Irratian, Radio Euskadin, Info7 eta Oiartzun Irratian. Jabier Jauregi, Kimetz ile-apaindegietako burua izango da protagonista. Azkenik, udazken aldera zozketa bat egingo da bezeroen artean, bezeroek ile-apaindegietako produktuen euskarazko izenak jarri beharko dituzte papertxo batzuetan.
 
Herrietako eremu hautaketa
Aurtengoan, gremio zehatza lantzeaz gain, herri bakoitzean gune, kale edo eremu bat hautatu eta bertako establezimenduetan sakonago eragiteko asmoa dutela adierazi du Irati Etxebeste Oiartzungo zinegotziak. Horretarako hiru fase ezberdin zehaztu dituzte gaia lantzeko: diagnosi orokorra, kanpoaldeko errotulazioa eta kalera begirako idatzi eta oharrak euskaratzeko ahalegina egingo da; establezimendu barruan bezeroei begira dituzten idatzi, ohar eta elementuak euskaratzeko ahalegina egingo da eta azkenik establezimenduan langileentzat dituzten idatzi eta elementuak (nominak, bisita txartelak, tiketak…) euskaratzeko saiakera egingo dute. 
 
Euskara Batzordea eta merkatariak
Irune Balentziagak azaldu duen bezala, urtean zehar, udalek merkatari eta ostalarientzat zein zerbitzu eskaintzen dituzten gogorarazteko eta ezagutzera emateko hainbat komunikazio ekintza burutzen dira: esku-orriak, katalogoak, gutunak… Eta tarteka euskara zerbitzutik teknikaria joaten zaie bisitan laguntza eskainiz. 
Arloa edo saila