Agenda

Maite den norbaiten galerarekiko doluak berdin eragiten die helduei zein haurrei, baina azken horien barneratzeko modua desberdina izan daiteke. Zereginean laguntzeko asmoz sortu zen haurrentzako antzezlana dugu hau. Elara protagonistak ezagutzen duen norbait izar-hauts bihurtzen ikusi eta bere bila espaziora joatea erabaki du. Galaxiatik galaxiara eta planetatik planetara bidaiatuko du bizitzaren zentzua ulertzen saiatuz, bere dolua igarotzen duen bitartean.

Lana, arrakasta, balioa edo estatusa bezalako kontzeptuekin lotzen dugu. Garrantzitsua edo ezinbestekoa izatearen sentsazioa liluragarria da; baina hain arrakastatsua bazara, zergatik jarraitzen duzu astean 40 ordutik gora lanean?

LANAk denok harrapatuta gaituen lan-kultura obsesiboa islatuko du, txikitatik eta ia heriotzaraino irauten duen tranpa.

OSA+MUJIKAren iraupen luzeko bosgarren obra da, bost interpretek taularatua.

FITXA ARTISTIKO-TEKNIKOA:

Zuzendaritza: OSA+MUJIKA

Koreografia: Jaiotz Osa

Dantzariak: Rafke Van Houplines + Maddi Ruiz de Loizaga +

Paula Parra + Adrián Bolaños + Jaiotz Osa

Eszenografia+jantziak: Xabier Mujika

Musika: Gartxot Unsain

Argiztapena-diseinua: Isa del Moral

Argiztapena biran: Aitor Etxebarria

Argazkiak: Carlos Ojeda + Mariló Miguez

Bideoa: Renata L. Etanowski

Ekoizpena: OSA+MUJIKA

Garbiñe Insausti abeslari eta aktoreak eta Iñaki Salvador pianista ezagunak bat egingo dute HEGOAK izeneko musika-ikuskizuna eskaintzeko. Emozioz betetako bidaia musikatua izango da, eta guztiok ezagutzen ditugun Mikel Laboaren edo Imanolen abestiak joko dituzte; pixkanaka, beste leku batzuetako soinu eta abestietara hurbilduko gaituzte, eta gure egingo dituzte Edith Piaf, Jaques Brell edo Kurt Weill artista handien abestiak.

HEGOAK ez da kontzertua soilik, antzerki-proposamena ere bada, Pessoa, Galeano edo Lorcaren testu laburrak biltzen dituena. Horrez gain, autoreei eta beren abestiei lotutako pasadizoak eta istorio laburrak ere gogoraraziko dizkigute. Horrez gain, Maider Zapiriain biolontxelo-jotzailearen parte-hartze berezia ere izango dugu.

Fitxa artistikoa:

• Zuzendaritza: Garbiñe Insausti
• Antzezleak: Garbiñe Insausti (Ahotsa), Iñaki Salvador (Pianoa) eta Maider Zapirain (Biolontxeloa)
• Konponketa musikalak: Iñaki Salvador

Artea hiru lagunen arteko komedia da. Sergiok koadro moderno bat erosi du dirutza handia ordaindu ondoren. Marcosek gorroto dio koadroari, gainera kosta egiten zaio sinistea Sergiori koadroa benetan gustatzen zaionik. Hirugarren laguna, Ibon, saiatzen da Marcos eta Sergioren arteko desadostasunean bitartekari izaten. Arte modernoari buruzko azaleko desadostasuna izanik, adiskidetasunari buruzko eztabaida latza bihurtzen da, Ibon erdi-erdian hartuta.

Antzezlanak aurrera egiten duen moduan, koadroaren auzia erabat puztuko da bat-batean desagertzeko, haserrealdiaren benetako arrazoiak azalean argi utziaz.

Fitxa artistikoa:

• Egilea: Yasmina Reza
• Zuzendaria: Begoña Bilbao Lejarzegi
• Antzezleak: Ramon Agirre, Joseba Apaolaza, Asier Hormaza