Mintzalagun ekimena aurkeztu da gaur goizean Lezoko Udaleko Kultura Aretoan egindako prentsaurrekoan. Mintzalagun ekimenaren helburua euskararen erabilera sustatzea da, mintzatzeko eta ikasteko guneak sortuz. Iker Salaberria Euskara zinegotziak ekimen honen garrantzia azpimarratu du, batez ere, gaztelania gero eta gehiago erabiltzen den testuingurua iraultzeko.
Aurkezpenean, Iker Salaberria zinegotziak euskarak Lezon duen egoera konplexuari buruz hitz egin du, eta adierazi du, UEMA herria izan arren, hizkuntzaren erabileran atzerapen kezkagarria dagoela. "Gaur gaurkoz Lezon ere euskaraz bizi ahal izateko hainbat eragozpen eta oztopo bizi ditugu, eta erdara da nagusi gure herrian", azaldu du Salaberriak.
Zinegotziak aipatu du, halaber, hizkuntza-ohiturak aldatzen ari direla. Ikuspegi orokor batetik, sekula ezagutu gabeko abiadan ari da aldatzen gure gizartea, eta gaur egungo joera orokorrak ez dira aldekoak. Teknologia berrien eraginak, sare sozialen sarbideak, eta ikus-entzunezkoek herritar isolatuz eratutako gizarte homogeneoak bultzatzen dituzte, eta jendartearen zahartze prozesua, zein migrazio mugimenduak ere biziki ari dira aldatzen gure ingurunea urte gutxitan. “Gurera etorrita, azken urteotan, euskararen aurkako oldarraldi betean gaude, herritarren eskubideak bermatzeko urratsak bertan behera uzten ikusten ari gara", gaineratu du.
Udalaren aldetik, euskararen normalizazioa bultzatzeko plan estrategikoa definitzen eta horrekin batera bi norabidetan lan egiten ari direla azpimarratu du. “Batetik, euskararen ezagutza zabaltzen, euskara herritar guztien eskura egon dadin ari gara. Norabide horretan, AEKrekin aspaldi dugun hitzarmena, eta aurten maila gainditu behar izateko baldintza kendu dugu, laguntza jaso ahal izateko. Bestetik, euskaraz lasai, eroso hitz egiteko espazioak sortzea litzateke. Eta gaur aurkezten dugun egitasmoa bide horretan kokatzen dugu”, azpimarratu du Iker Salaberriak.
Mintzalagun ekimena
Mintzalagun ekimenean nola parte hartu dezakegun azaldu du Edurne Lizarazu proiektuaren arduradun eta AEK-ko kideak. "Programa hau pertsonek akatsik egiteko beldurrik gabe euskara praktikatu ahal izateko ingurune bat errazteko diseinatu da", aipatu du. Lizarazuk azaldu duenez, metodologia bi motatako parte-hartzaileen elkarbizitzan oinarritzen da: bidelagunak, euskarazko hiztun trebeak, eta bidelariak, hizkuntzarekiko arintasuna eta konfiantza hobetu nahi dutenak.
"Mintzalagun ez da klase tradizionala. Hemen, elkarren arteko elkarrizketaren eta laguntzaren bidez ematen da irakaskuntza", zehaztu du Lizarazuk. "Bidelariak erraztaileak dira, eta giro atsegina sortzen dute bidelariak askatasunez adierazteko. Kontua ez da zuzentzea, baizik eta euskararen erabileran laguntzea eta erosotasuna sustatzea". Dinamika horri esker, parte-hartzaile guztiak baloratuta eta motibatuta senti daitezke beren hizkuntza-trebetasunak hobetzeko. Bidelaria izateko, B1 hizkuntza-eskakizuna izan behar da gutxienez.
Prozedura erraza da: parte hartu nahi duenak izena eman besterik ez du euskaltegian, aurrez aurre, telefonoz edo posta elektronikoz, eta, matrikulatu ondoren, talde bat esleituko zaie, eurek aukeratutako guneetan biltzeko. "Bilerak giro informalean egingo dira, parte-hartzaileei eztabaidatu beharreko gaiei eta egin beharreko jarduerei buruz erabakitzeko aukera emanez", azaldu du Lizarazuk. Malgutasun hori funtsezkoa da parte-hartzaileak eroso eta prozesuarekin konprometituta senti daitezen.
"Bilera bakoitza hizkuntza partekatzeko eta gozatzeko aukera bat izatea nahi dugu, euskara gure bizilagunen eguneroko bizitzaren parte bihurtuz", gaineratu du. Lizarazuk azpimarratu du jarduerak inklusiboak eta askotarikoak izateko pentsatuta daudela, eta kanpoaldean egin ahal izango direla, giro lasaiagoa eta parte-hartzaileagoa lortzeko.
Azkenik, Iker Salaberriak urriaren 18an Lezoko Salside plazan mintzodromoa egiteko parte hartzera animatu ditu lezoarrak. Ekitaldi honetan, Mintzalagun ekimenari buruz gehiago jakiteko aukera izango dute bertaratzen direnek, baita eskualdeko beste herri batzuetako mintzalagunekin esperientziak partekatzeko ere. "Euskara giro atsegin eta lasaian praktikatzeko une aproposa izango da", nabarmendu du Salaberriak, ekimen honetan parte hartzera gonbidatuz.