Lezoko Udaletxeko Biltzar Areto Nagusian, 2007ko ekainaren 12an, asteartea., 8:40etan, eratu da OSOKO UDALBATZA, EZOHIKOA egiteko xedez, lehen deialdian, Kepa Garbizu Azkue alkatearen lehendakaritzapean eta ondorengo zinegotzi hauek bertan direla: Iñake Urrestarazu Azurmendi (EA taldea), Mikel Antton Arrizabalaga Brusín (PSE taldea), Jesus Maria Martiarena Jaka (EAJ taldea), Aitor Mimendia Artuzamonoa (EAJ taldea), Enrique Figueroa Laboa (EAJ taldea), Noemí Arberas Osés (EAJ taldea), Ainhoa Villanúa Ayuela (PSE taldea) eta Maria Luz Anglada González (PP taldea).
Ez dira bilkurara etorri Isabel López Aulestia (IU-EB taldea), kanpoan delako, eta Aroia Goienetxea Egibar (EAJ taldea).
Bertan da eta egintzaren fede eman du udal idazkaria den Xabier Loiolak.
Patxi Apalategi aritu da itzultzaile lanetan.
1.- Proposamena, Lezoko Udalaren jabetzako partzelaren gaineko azalera eskubidea adjudikatu eta lagatzeko kontratuaren aldaketa onartzeko (2007H0120002).
Gaia batzorde berriemaileak aztertu eta diktaminatu gabe dagoenez, alkateak, lehenik, gaia eztabaidatzearen urgentzia berrestea eskatu die zinegotziei. Alkatearen esanetan beharrezkoa da kontratua hitzez agindu zaienera, gaurko egoerara egokitzea.
Urgentzia onartu dute bileran diren zinegotzi guztiek.
Ondoren alkateak proposamena irakurri du. Honela dio proposamenak hitzez hitz:
1) Espedientearen hasiera
Lezoko Udalak 2003ko apirilaren 3ko udalbatza-akordioaren bidez onartu zuen Lezoko Udalaren jabetzako partzelaren gaineko azalera eskubidea adjudikatu eta lagatzeko kontratuaren Klausula Administratiboen Agiria. Agiri horiek 2003ko maiatzaren 14ko plenoaren akordio bidez aldatu ziren. .
Halaber Lezoko Udalak 2003ko ekainaren 9ko plenoaren akordioaren bidez adjudikatu zion behin betiko Construcciones Sukia Eraikuntzak, S.A. enpresari Lezoko Udalaren jabetzako partzelaren gaineko azalera-eskubidearen lagapena, baldintza agiri horren I eranskinean deskribatu bezala. Lezoko Udalak bere aldetik adjudikatzedunak proposaturiko aldaketak onartu zituen azalera-eskubidearen adjudikazioaren baldintza ekonomikoak hobetzeko.
Lezoko Udalak Construcciones Sukia Eraikuntzak, S.A. enpresarekin 2003ko ekainaren 12an formalizatu zuen kontratua arautzen duen baldintza agiriko bederatzigarren klausulan xedatzen denez,
"Proiektuko gizarte-ekipamendutara xedatutako lokalak eta etxebizitza tutelatuak bukaturik entregatuko zaizkio Udalari.
Eraikuntza Proiektuan gizarte-ekipamendutara xedatutako lokalak, alegia, eguneko zentroa, gizarte ongizateko bulegoak eta Lezoko Udalari entregatu beharko zaizkion zazpi apartamentu tutelatuak, eguneko zentroaren bainu geriatrikoak eta apartamentuetako sukalde-altzariak barne."
Lezoko Udalak 2003ko martxoaren 26ko udalbatzaren akordio bidez erabaki zuen bideragarritasun azterlana eta eguneko zentroaren eta apartamentu tutelatuen proiektua onartzea Pildain eskolak zeuden tokian egiteko, hau da, Markesaneko Zuhaiztian, kokagunerik egokiena dela iritzirik aipaturiko zerbitzuak eskaintzeko helburua duen eraikin bat jartzeko.
Bestalde 2006ko abuztuan aurkeztu zen proiektua Auñamendi kaleko 10 eta 12 zenbakietan dauden etxebizitza-eraikinetako bebarruetan egokitzapena egiteko, hau da, eguneko zentroa eta apartamentu tutelatuak jartzeko asmoa zen tokian, haurtzaindegia, gazte-lekua eta helduentzako ikasketa zentroa (E.P.A.) jartzeko, J.M. Toledo Etxepare arkitektoak idatzia, Lezoko Udalak enkargaturik. 2006ko irailean eranskin bat gehitu zitzaion Udalak berak eskaturiko aldaketa batzuekin. Proiektu hori materialki gauzatzeko aurrekontua guztira 285.357,71 € da.
J.M. Toledo Etxepare arkitektoak idatzitako egokitzapen proiektua ikusirik, Construcciones Sukia, S.A.k eskainte bat egin du, guztira 314.432,59 €, etxebizitzen obra aspaldi amaitu zela argudiatuz eta materialak eta makineria jada erretiratu direlako. Obrari ekiteko berriro giza baliabideak eta material guztiak berriro ekarri behar dira eta aurreikusitako obra ezin dute egin J.M. Toledo Etxepare arkitektoaren proiektuan finkaturiko prezioan. .
Raimundo Mendiburuk 2003 urtean idatzitako exekuzio proiektutik Construcciones Sukia, S.A. enpresak erauzketa egin du bebarruei legozkiekeen partidak eta neurketak aintzat hartuz, eta haren balioa 232.269,99 €tan kalkulatu dute.
Alabaina goian aipatutako baldintza agiriko bederatzigarren klausula kontutan harturik, eguneko zentroaren eta apartamentu tutelatuen osagarri asko ez ziren kontuan eduki jatorriko proiektuko aurrekontuan, horregatik udal arkitekto aholkulariak haren balorazioa egin du behe oineko lokalen kostu-prezioari eransteko, guztira 37.000 € ateratzen delarik Construcciones Sukia, S.A. enpresak kalkulatutako 232.269,99 € kopuruari eransteko, horrek guztira 269.269,99 € osatzen delarik.
Beraz baldin eta Construcciones Sukia, S.A. enpresak J.M. Toledo Etxeparek idatzitako proiektuari egindako eskainteari 269.269,99 € kopuruaren kenketa egiten badiogu, ateratzen den aldeko kopurua 45.162,60 € da exekuzio materialaren prezioa eta horri erantsi beharko litzaioke 19% kontratazko exekuzioarengatik dagokiona eta 16 % BEZari dagokiona. Guztira 62.342, 45 € ematen du Construcciones Sukia, S.A. enpresaren alde.
2) Kontratuaren datuak
- Xedea: Lezoko Udalaren jabetzako partzela baten gaineko azalera eskubidea Adjudikatzea eta Lagatzea.
- Kontratista: Construcciones Sukia Eraikuntzak, S.A.
- Adjudikatzea.
Organoa: Plenoaren data: 2003ko ekainaren 9a.
- Aurrez onartutako aldaketak: 2004ko otsailaren 18an.
3) Zuzenbide aplikagarria
Administrazio Publikoen Kontratuen Legearen Testu Bateratuko 59, 101, artikuluetatik (Ekainaren 16ko 2/2000 Errege Dekretu Legagilea), kontsiderazio hauek ateratzen dira:
1) Kontratu bat osatu ondoren posible da hartan aldaketak sartzea, interes publikoko arrazoirengatik.
Aipaturiko kontratua arautzen duen baldintza agiriko hogeita bosgarren klausularen arabera, Lezoko Udalak erabaki ahal izango du interes publikoko arrazoirengatik adjudikatze-baldintzen aldaketa aldez aurretik adjudikatzedunari entzunik eta egoki izango diren erantzukizun eta kalte-ordainekin.
Era berean baldintza agiri horretako bertako hogeita zortzigarren klausulak xedatzen du ezen, bertan aurreikusi gabeko orotan, Administrazio Publikoen Kontratuen Legearen Testu Bateratuan xedatutakoari jarraikiko zaio, hura garatzen duen arautegiari eta, halaber, Entitate Lokalen Ondasunen Arautegian xedatutakoari.
4) Erabaki proposamena
Aurrez esandako guztia dela eta, ondorengo akordio hau har dezan proposatzen zaio organoari:
1.- Lokalen Egokitzapen Proiektua onartzea Gazte-lekua, Haurtzaindegia eta Helduentzako Ikasketa Zentroa (EPA) J.M Toledo Etxepare arkitektoak idatzia.
2.- Construcciones Sukia, S.A.k egindako balorazioa onartzea Raimundo Mendiburuk 2003 urtean idatzitako exekuzio proiektutik ateratakoa bebarruei legozkiekeen partidak eta neurketak ontzat emanez, eta halaber hasierako proiektuan aintzat hartu gabeko elementuei Udal arkitekto aholkulariak eginiko balorazioan erantsitako kopuruak.
3.- Construcciones Sukia, S.A.k egindako eskainte ekonomikoa onartzea Lokalen Egokitzapen Proiektua exekutatzeko Gazte-lekua, Haurtzaindegia eta Helduentzako Ikasketa Zentroa (EPA) J.M Toledo Etxepare arkitektoak idatzia egiteko.
4.- Bere garaian Construcciones Sukia Eraikuntzak, S.A. enpresari adjudikatutako Lezoko Udalaren jabetzako partzelaren gaineko azalera eskubidea adjudikatu eta lagatzeko kontratuaren aldaketak onartzea, hauek direlarik:
a) Construcciones Sukia, S.A. enpresak Auñamendi kaleko 10 eta 12 zenbakietan kokaturiko eraikinen bebarruetan Lokalen Egokitzapen Proiektua exekutatu beharko du Gazte-lekua, Haurtzaindegia eta Helduentzako Ikasketa Zentroa (EPA) egiteko, J.M Toledo Etxepare arkitektoak idatzi bezala, hasierako Eraikin Proiektuan aurreikusitako ekipamendu sozialetara xedatutako lokalen ordez, alegia, eguneko zentroa, gizarte ongizate bulegoak eta zazpi apartamentu tutelatuak.
b) Lezoko Udalak ordainduko du, obra hauek egiteagatik, ondorengo eragiketa hauen emaitzako kopurua:
1.- Construcciones Sukia Eraikuntzak S.A. enpresak ziurtapen bat egingo du benetan egindako eta udal teknikariak ikuskatutako obran oin hartuz.
2.- Neurketa horiei prezio unitarioak aplikatuko zaizkie, alegia, Construcciones Sukia Eraikuntzak S.A. enpresaren eskaintean jasotakoak.
3.- Ziurtatutako guztirako kopuruari 269.269,99 €ren kenketa egingo zaio, hasieran aurreikusitako proiektuaren exekuzio materialaren balorazioari dagokiona.
4.- Kenketa horren emaitzako kopuruari 19% gehikuntza aplikatuko zaio, kontratazko exekuzioari dagokiona, eta 16% BEZari dagokiona, horrela aterako delarik Lezoko Udalak ordaindu beharreko zenbatekoa.
Jendartetik Aitor Sarasolak hartu du hitza. Lezoren Alde Herri Plataformaren izenean dio zabarkeria eta kudeaketa ezaren adierazle dela gaia orain eta horrela ateratzea, lege-aldi honek duela lau urte ofizialki erabakitakoa legealdiko azken unean eta presaka tramitatzea. Salatu du, espedientean ez dagoela inongo dokumenturik edo eztabaidarik lekualdatze berri horrek afektaturik gertatzen diren inplikatuekin, haien jarduerarako lokalen egokitasunari buruzkorik. Harritu da eguneko zentroa jartzeko toki desegokia zela ziotenek orain haurtzaindegia jartzeko erabakia hartzearekin. Salatu du obra garestitu izana, eta horren arrazoi bakarra obrak garaiz ez burutzea izatea, orain 62.000 € ordaindu beharko dituelako bere egunean obrak burutu ez izanagatik. Bere iritziz rebantxismo politikoa oinarri duen erabakia da, eta guztiz zabarkeriaz eta modu traketsez kudeatua.
Jendartetik Iñigo Esnaolak kritikatu du legealdia bukatzeko hiru egun falta direnean honelako erabakiak hartzea. Arduragabe aritzea leporatzen die. Zentzu horretan gogoratu du, joan den astean alkate gai berriak eta beste zinegotzi batzuek gaur egungo alkateari, eta gobernu taldearekin izandako bileran, egindako eskaera: ez zezatela geroko iharduna baldintzatuko zuen erabakirik hartu, hori utz zezatela hauteskundeek erabakitako zinegotzi berrien gain. Halere, azken egunean erabakiak hartuz, herriaren interes orokorra kontutan izan gabe, haurtzaindegiko langile eta gurasoenganako errespetu falta azalduz erabakiak hartzen jarraitzea leporatu die.
Mikel Antton Arrizabalaga zinegotziak, PSE taldearen izenean, dio erabakia ez dela rebantxismoaren ondorio, hartutako konpromisoak daudela tarteko. Onartzen du, beste gai batzuekin gertatu bezala, honetan ere berandu xamar aritzea.
Aitor Mimendiak, EAJ taldeko zinegotziak, dio ardura kontua dela Auñamendiko ekipamendua aldatzearena, argi dagoenean aurreko legealdiak aurreikusitako ekipamendua motz gelditzen zela Lezoren beharretarako. Gogoratu du Aiton Bordako Jubilatuen batzar orokorrak Pildain eraikina minimotzat jo dutela. Gogoratu du Pildaingo proiektua autofinantzatu egiten dela. Eta gogoratu du era berean, Auñamendi zentroan 7 apartamentu tutelatu eta 20 "eguneko plaza" aurreikusten baziren ere, orain, Pildaingo proiektu berrian 20 apartamentu eta 40 "eguneko plaza" aurreikusten direla. Erabakian ez dagoela rebantxismo politikorik, herriak dituen beharrei erantzutea baizik. Agian Pildain ezin zen aurrera atera aurreko legealdian, baina orain aukera hori izan da eta aprobetxatu egin da.
Jendartetik Aitor Sarasolak dio espedientean ez dagoela txosten bat bera ere dimentsionamendu hori justifikatzen duenik. Pildainek suposatzen duen aldaketa kualitatibo bakarra apartamentu tutelatuetan omen dago eta, Auñamendin ez bezala, hauek ez dute Aldundiaren inongo dirulaguntzarik jasoko. Aiton Bordako batzarren argudioa erabiltzea ez omen da zilegi, egoitza ere eskatzen omen da. Gogoratu du Lezoko adinekoen eskaera nagusia dela azpiegitura oraintxe bertan egitearena, berdin da Auñamendin edo beste edonon, baina segituan; eta penagarria da duela zortzi urte mila sinadurarekin egindako azpiegitura eskaera oraindik ere ia hasieran bezalaxe egotea; hori da egoera eta ez besterik.
Alkateak dio dimentsionamenduari buruzko txostenak badirela, bai Aldundikoa bai Gizarte Zerbitzuetako arduradunarena. Aitor Sarasolak dio hori ez dela horrela eta alkateak berak ere oso ondo omen daki.
Beste eztabaidarik gabe, alkateak proposamena onartzea eskatu die bilkura-kideei. Proposamena aho-batez onartu da, aldeko hamar botorekin.
Aktaren amaiera.
Beste aztergairik geratzen ez denez, alkate-lehendakariak 9:05etan eman dio buru bilkurari. Eta nik, idazkari naizen aldetik, akta .etik .ra arteko zenbakiak dituzten orri ofizialetan jaso eta horren guztiaren fede ematen dut, eta bilkuran izan diren zinegotzi guztiek izenpetu egin dute akta hau.