Martxoko osoko bilkuran Etxebizitza Plana onartu dute aho batez.
Lezoar askoren bizi proiektuak etxebizitza lortzeko zailtasunak baldintzatzen ditu, eta etxebizitza eskubidea bermatzea ezinbestekoa da bizitza duina izan ahal izateko.
Arazo horri aurre egiteko, Lezoko Udalak duela aste gutxi aurkeztu zuen Etxebizitza Plana. Martxoko Osoko Bilkuran onartu zen.
Erabaki honek bi puntu nagusi ditu: alde batetik, hurrengo hiru urteetan udal etxebizitza politika gidatuko duen Ekintza Plana onartzea eta, bestetik, Lezo Tentsio Handiko Bizitegi Eremu izendatzeko eskaera egitea Eusko Jaurlaritzari.
Ekintza Planak bost asmo nagusi jasotzen ditu:
- Babes publikoko etxebizitza parkea handitzea
Etxebizitzen prezioan eragiteko beharrezkoa da etxebizitza eskaintzan eragitea. Horrela, babes publikoko bizitegi-erabilerako etxebizitzen parkea handitu nahi du Lezoko Udalak. Horretarako, Olatzar eta Isasti eremuetan promozio berriak aurreikusten ditu.
- Hutsik dauden etxebizitzak merkaturatzea
Iaz onartu zituen horretara bideratutako zerga ordenantzak, jokabide egokiak saritu eta desegokiak ahalik eta gehien murrizteko helburuarekin. Alegia, etxe hutsak alokairu merkatura prezio eskuragarrietan bideratzea sustatzea, eta inolako erabilerarik ematen ez zaien etxe hutsak izatea eragoztea.
Horretarako, Ondasun Higiezinen Zergaren kuota osoaren % 50eko hobaria aplikatuko zaie, Eusko Jaurlaritzaren Bizigune programaren barruan, erabilera-lagapena duten etxeei. Programa honen helburua hutsik dauden pisuak alokairu babestuaren arrazoizko prezioan merkatuan jartzera bideratzea da.
Zerga berean, %100eko errekargua ezarriko da etxebizitza hutsen kasuetan, etxe hutsak eragotzi eta merkaturatzea bultzatzea ezinbestekoa baita Udalarentzat. Horretarako, identifikatutako 115 etxe hutsen jabeei errekarguaren jakinarazpena egin die.
Merkaturatzea oztopatu dezakeen arazoetako bat eraikinen eta etxebizitzen birgaitze beharra izan daiteke. Behin etxe hutsen kasuan egon litezkeen beharrak zehatzago ezagututa, birgaitze lan horiek sustatzeko balizko diru-laguntza lerro espezifikoak edota zerga neurriak aztertuko du.
- Zailtasunak dituzten kolektiboei laguntzea
Herriko biztanle guztiek ez dituzte aukera berdinak etxebizitza duina izateko. Esaterako, gazteek edota bazterkeria-arriskuan dauden pertsonek zailtasun bereziak dituzte. Horiei begirako neurri espezifikoak hartzea beharrezkoa da.
Neurri horien artean kokatzen dira eurentzat eskuragarri dauden laguntza-programen berri ematea, edota Udalak berak eskaintzen dituen laguntzak herritarrei eskuragarri jartzea, informazioa zabalduz edo aholkularitza eskaintzak aztertuz.
- Erabilera turistikoko etxebizitzak arautzea eta kontrolatzea
Lezoko udalerrian oraindik gutxi badira ere, Donostiaren inguruan kokatzeak arrisku bizian jartzen du. Joera orokorrak ikusita, etorkizun hurbilean Lezorentzat ere arazo bilakatu daitezke. Horregatik, aurre hartzea, gaiaren inguruko hausnarketa egitea, eta datozen urteetarako hauek erregulatzeko eman beharreko pausuak zehaztea aurreikusi du Udalak.
- Erakunde artean koordinatzea eta zerbitzu osagarriak eskaintzea
Lezoko Udalaren ahalmenak eta eskumenak nahiko mugatuak dira. Horregatik, Udalak egiten duenaz gain, ezinbestekoa da gainerako administrazioarekin ere behar bezala koordinatzea eta guztion baliabideak norabide berdinean eragiteko baliatzea.
Lehen koordinazio mailan, eskualdeko etxebizitza bulego integrala martxan jartzea aztertuko du Udalak. Bestalde, Eusko Jaurlaritzari dagokionez, jada martxan dituen programen eta laguntzen berri herritarren artean ahalik eta modu eraginkorrenean zabaltzeko, eurekin lankidetza hitzarmena sinatzea du helburu.
Ekintza Plan hau beharrezkoa da Lezo Tentsio Handiko Bizitegi Eremu izendatzeko. Hori da, hain zuzen, Osoko Bilkuran hartutako bigarren erabakia. Eusko Jaurlaritzari Lezo Tentsio Handiko Gune izendatzeko eskaera egingo dio udalak.
Izendapen horrekin, Lezoko Udalaren eskumenak zabalagoak izango lirateke, eta horrela, zuzenean eragin dezake, besteak beste, etxebizitzen salmenta eta alokairuen prezioaren igoeran.
Mikel Arruti alkateak azaldu duenez, erabakia aho batez hartu zuten EAJko, PSEko eta EH Bilduko zinegotziek. Balorazio positiboa egin du: "Udal gobernuak balorazio positiboa egiten dugu, izan ere, herritar askori eragiten dion arazoari guztion artean erantzutea beharrezkoa baita".